ខេត្តកណ្តាល ៖ បុរសម្នាក់ត្រូវសង្សារប្តឹងចោទប្រកាន់ពីបទចាប់រំលោភសេពសន្ថវៈ លុះត្រូវរ៉ូវស្រឡាញ់គ្នាវិញ និងរៀបចំសែនព្រេនមានចាស់ទុំដឹងឭ ជាប្តីប្រពន្ធ អត់ទៅដកពាក្យបណ្តឹងវិញ ៨ឆ្នាំក្រោយមានកូនមួយអាយុ៧ឆ្នាំ ។ ខណៈរស់នៅជាមួយគ្នាយ៉ាងសុខសាន្ត កាលពីព្រឹកថ្ងៃទី២១ ឧសភា ២០១៤ ប្តីដែលជាប់ចោទតាំងពី៨ឆ្នាំមុន បានត្រូវនគរបាលក្រុងតាខ្មៅចាប់ខ្លួនតាមដីកាបង្គាប់របស់តុលាការខេត្តកណ្តាល ពីបទរំលោភសេពសន្ថវៈ ។
មន្ត្រីនគរបាលក្រុងតាខ្មៅឱ្យដឹងថា ជនត្រូវចោទឈ្មោះ អឿន សំអាង ភេទប្រុស អាយុ២២ឆ្នាំ មានលំនៅភូមិព្រែកសំរោង សង្កាត់តាខ្មៅ ក្រុងតាខ្មៅ ។ ជននេះត្រូវចាប់ខ្លួនតាមដីការបស់ចៅក្រមស៊ើបសួរសាលាដំបូងខេត្ត លោក កេង សុម៉ារិទ្ទ ចុះថ្ងៃទី៣០ មេសា ២០១៤ បានបង្គាប់ឱ្យសមត្ថកិច្ចសាធារណៈស្រាវជ្រាវចាប់ខ្លួនឈ្មោះ អឿន សំអាង ជាប់សង្ស័យពីបទរំលោភសេពសន្ថវៈ ប្រព្រឹត្តិកាលពីថ្ងៃទី២១ មីនា ២០០៦ នៅភូមិព្រែកសំរោង សង្កាត់តាខ្មៅ ក្រុងតាខ្មៅ ។
មន្ត្រីនគរបាលក្រុងតាខ្មៅ ដែលនៅចាំដំណើររឿងនេះឱ្យដឹងថា កាលពី៨ឆ្នាំមុន ឈ្មោះ អឿន សំអាង ត្រូវសង្សាររបស់ខ្លួន បច្ចុប្បន្នជាប្រពន្ធប្តឹងចោទប្រកាន់ថាមានជាប់ពាក់ព័ន្ធរំលោភសេពសន្ថវៈលើរូបនាង ។ ភ្លាមៗ អឿន សំអាង មិនបានចូលខ្លួនមកដោះស្រាយជាមួយដើមបណ្តឹងជាសង្សារទេ និងបានរត់គេចខ្លួនបាត់ ។
មន្ត្រីនគរបាលឱ្យដឹងទៀតថា ក្រោយមកទៀត អឿន សំអាង បានត្រូវរ៉ូវគ្នាជាមួយសង្សារ ដែលជាដើមបណ្តឹងវិញ និងបានរៀបចំសែនព្រេនជាមួយគ្នាជាប្តីប្រពន្ធ ។ ចំណែកដើមបណ្តឹង ក្រោយពីបានគ្នាជាប្តីប្រពន្ធហើយ មិនទៅដកពាក្យបណ្តឹងវិញទេ ហើយនគរបាលបានកសាងសំណុំរឿងបញ្ជូនទៅតុលាការ ហើយតុលាការបានចេញដីកាកោះហៅឈ្មោះ អឿន សំអាង នេះញឹកញាប់តែ អឿន សំអាង មិនចូលខ្លួនមកបំភ្លឺ រហូតដល់ថ្ងៃទី៣០ មេសា ២០១៤ ទើបចៅក្រមសើបសួរចេញដីកាបង្គាប់ឱ្យចាប់ខ្លួនតែម្តង ។
ស្ត្រីឈ្មោះ ម៉ៅ សាវ៉ាត អាយុ៣២ឆ្នាំ ជាប្រពន្ធជនត្រូវចោទ និងកាលពី៨ឆ្នាំមុនជាដើមបណ្តឹងឱ្យដឹងថា កាលពីកើតហេតុ ៨ឆ្នាំមុននោះ គាត់បានប្តឹងអ្នកផ្សេងទេ ចំណែកឈ្មោះ អឿន សំអាង គ្រាន់តែមានឈ្មោះពាក់ព័ន្ធពេលកើតហេតុនោះទេ ។
No comments:
Post a Comment